ఎన్నారైకి రూ.24 కోట్ల మేర టోకరా వేసిన తెలంగాణ నేత!

వ్యాపారంలో పెట్టుబడుల పేరుతో ఓ ఎన్‌ఆర్‌ఐని రూ.24.53 కోట్లు మోసం చేశారన్న ఆరోపణలపై బీజేపీ నేత, ప్రముఖ వ్యాపారవేత్త గజ్జల యోగానంద్‌పై కేసు నమోదైంది. బాధితుడి ఫిర్యాదు మేరకు సైబరాబాద్ పోలీసుల ఆర్థిక నేరాల విభాగం (ఈఓడబ్ల్యూ) ఈ కేసు నమోదు చేసి దర్యాప్తు ప్రారంభించింది.

పోలీసుల కథనం ప్రకారం, అమెరికాలో నివసించే పవన్ కుమార్ నల్లమల అనే ఎన్‌ఆర్‌ఐకి, మంజీరా హోటల్స్ అధినేత అయిన యోగానంద్‌తో 2014 నుంచి వ్యాపార పరిచయం ఉంది. 2019లో పవన్ కుమార్ భారత్‌కు వచ్చినప్పుడు, తన వ్యాపారాల్లో పెట్టుబడి పెడితే అధిక లాభాలు వస్తాయని యోగానంద్ నమ్మించారు. ఆయన మాటలు విశ్వసించిన పవన్ కుమార్, 2019 నుంచి 2024 మధ్య విడతల వారీగా మొత్తం రూ.24.53 కోట్లు పెట్టుబడిగా సమకూర్చారు.

అయితే, డబ్బు తీసుకున్న యోగానంద్.. ఆ మొత్తానికి సంబంధించిన షేర్లను పవన్ కుమార్ పేరిట బదిలీ చేయలేదు. బాధితుడు పలుమార్లు అడిగినా స్పందన లేకపోవడంతో, 2024 నవంబర్‌లో విశ్వాసం కోసం ఇరువురి మధ్య ఒక అవగాహన ఒప్పందం కూడా జరిగింది. నిధులు అందినట్లు అంగీకరిస్తూ, త్వరలోనే షేర్ల బదిలీ పూర్తి చేస్తానని యోగానంద్ ఆ ఒప్పందంలో హామీ ఇచ్చారు.

ఆ హామీతో పవన్ కుమార్ అమెరికా వెళ్లగా, వాట్సాప్ ద్వారా సంప్రదించినప్పుడు యోగానంద్ తప్పించుకు తిరిగారని, ఆ తర్వాత రిజిస్ట్రేషన్ పూర్తయిందని తప్పుడు సమాచారం ఇచ్చారని బాధితుడు ఫిర్యాదులో పేర్కొన్నారు. 2025 డిసెంబర్‌లో భారత్‌కు తిరిగొచ్చి ఆరా తీయగా, షేర్లు తన పేరు మీదకు బదిలీ కాలేదని తెలియడంతో మోసపోయినట్లు గ్రహించి పోలీసులను ఆశ్రయించారు. ఈ ఫిర్యాదు ఆధారంగా సైబరాబాద్ పోలీసులు కేసు నమోదు చేసి దర్యాప్తు చేస్తున్నారు.